ചെങ്ങളായി പഞ്ചായത്തിലേക്കുള്ള വൈദ്യുതി വിതരണം ഭൂഗർഭ സംവിധാനത്തിലേക്ക്
ശ്രീകണ്ഠപുരം:
ചെങ്ങളായി പഞ്ചായത്തിലേക്കുള്ള വൈദ്യുതി വിതരണം അണ്ടർ ഗ്രൗണ്ട് കേബിൾ (ഭൂഗർഭ സംവിധാനം) വഴിയാക്കുന്നു. ചെങ്ങളായി, വളക്കൈ, കൊയ്യം, ചുഴലി മേഖലകളിലേക്കും സമീപ പ്രദേശങ്ങളായ പരിപ്പായി, ചെമ്പന്തൊട്ടി, കുറുമാത്തൂർ പ്രദേശങ്ങളിലേക്കും വൈദുതി എത്തിക്കുന്നത് ശ്രീകണ്ഠപുരം സബ്സ്റ്റേഷനിലെ 11 കെവി വളക്കൈ ഫീഡർ വഴിയാണ്.
വർഷങ്ങൾക്കു മുമ്പ് പറമ്പുകൾക്ക് കുറുകെ വലിച്ച ലൈനിൽ കാലപ്പഴക്കം കൊണ്ടും മരക്കമ്പുകൾ വീഴുന്നതിനാലും വൈദ്യുതി തടസം പതിവാണ്. 40 കിലോമീറ്ററിലധികം നീളമുള്ള ലൈൻ സമൂലമായി മാറ്റിപണിയുന്ന ഉദ്യമത്തിലാണ് കെഎസ്ഇബി. ഇതിന്റെ ഭാഗമായി വളക്കൈ പാലം മുതൽ തട്ടേരി വരെ ഒരു കിലോമീറ്റർ പുതിയ ലൈൻ വലിച്ച് കമ്മീഷൻ ചെയ്തു. ചെങ്ങളായി മുക്കാടം മുതൽ വളക്കൈ ടൗൺ വരെ നിടുവാലൂർ വഴിയും തട്ടേരി മുതൽ ചുഴലി വരെയും ഏഴ് കിലോമീറ്റർ പുതിയ ലൈൻ പണി നടന്നുകൊണ്ടിരിക്കുന്നു. നെല്ലിക്കുന്ന് മുതൽ മോട്ടക്കേപ്പീടിക വരെയുള്ള നാല് കിലോമീറ്റർ ലൈൻ പണി ഉടൻ ടെൻഡർ ക്ഷണിക്കും.
പഴയ ക്രോസ്കൺട്രി ലൈനുകൾ മാറി റോഡ് വഴി പുതിയ ലൈൻ ചാർജ് ചെയ്യുന്നതോടെ വൈദ്യുതി തടസത്തിൽ കാര്യമായ കുറവുണ്ടാകും. ഫീഡറിന്റെ നീളം കുറക്കാനും അതുവഴി വോൾട്ടേജ് മെച്ചപ്പെടുത്താനും സബ് സ്റ്റേഷനിൽ നിന്ന് ചെങ്ങളായിയിലേക്ക് പരിപ്പായി വഴി രണ്ട് ഭൂഗർഭ കേബിളുകൾ സ്ഥാപിച്ച് വളക്കൈ ഫീഡറിനെ വിഭജിച്ച് പുതിയ ചുഴലി ഫീഡർ നിർമിക്കാനുള്ള പദ്ധതിക്കും ടെൻഡർ നൽകിയിട്ടുണ്ട്. 3.5 കിലോമീറ്റർ കേബിളാണ് ഇതിനുപയോഗിക്കുക. കെഎസ്ഇബി യുടെ വൈദ്യുതി പദ്ധതിയിൽ 1.75 കോടി രൂപ മേൽ പ്രവൃത്തികൾക്കായി നീക്കിവച്ചിട്ടുണ്ട്. ഈമാസം തന്നെ കേബിൾ പണി തുടങ്ങാൻ ശ്രമിക്കുന്നതായി അസി. എൻജിനിയർ എ. പദ്മനാഭൻ അറിയിച്ചു.
No comments