റോഡ് സുരക്ഷയിൽ വിട്ടുവീഴ്ചയില്ല; നിയമലംഘകർക്കെതിരെ കർശന നടപടി: മുഖ്യമന്ത്രി

_തിരുവനന്തപുരം: നിരുത്തരവാദപരമായ ഡ്രൈവിങ്ങും സ്വകാര്യ ബസുകൾ തമ്മിലുള്ള അപകടകരമായ മത്സരയോട്ടവും വർധിച്ചുവരുന്ന സാഹചര്യത്തിൽ നിയമലംഘകർക്കെതിരെ കർശന നടപടി സ്വീകരിക്കുമെന്ന് മുഖ്യമന്ത്രി വി.ഡി സതീശൻ. അപകടകരമായ ഡ്രൈവിങ് കാരണം മനുഷ്യജീവനുകളാണ് നഷ്ടമാവുന്നത്. ഓരോ അപകടവും കുടുംബങ്ങളെ തീരാവേദനയിലാഴ്ത്തുന്നു. ഓരോ ജീവഹാനിയും നികത്താനാവാത്ത നഷ്ടമാണ്. ഈ പ്രവണതകൾക്ക് അറുതി വരുത്തേണ്ടതുണ്ട്.അശ്രദ്ധമായ ഡ്രൈവിങ്ങും ഗതാഗത നിയമലംഘനങ്ങളും മൂലം ഒരൊറ്റ ജീവൻ പോലും ഇനി നഷ്ടപ്പെടാൻ ഇടവരരുത്. നിയമലംഘകർക്കെതിരെ കർശന നടപടി സ്വീകരിക്കാനും പരിശോധനകൾ ശക്തമാക്കാനും പൊലീസിനും മോട്ടോർ വാഹന വകുപ്പിനും കർശന നിർദേശം നൽകിയിട്ടുണ്ട്._

_സ്വകാര്യ ബസ് ജീവനക്കാർക്ക് പോലീസ് ക്ലിയറൻസ് സർട്ടിഫിക്കറ്റും സ്മാർട്ട് ഐഡിയും നിർബന്ധമാക്കിയിട്ടുണ്ട്.ഓരോരുത്തർക്കുമായി  വീട്ടിൽ ആളുകൾ  കാത്തിരിക്കുന്നുണ്ട്. ഒരു യാത്രയോ ലക്ഷ്യസ്ഥാനമോ അൽപ്പനേരത്തെ തിടുക്കമോ മനുഷ്യജീവനേക്കാൾ വിലപ്പെട്ടതല്ലെന്ന് എല്ലാവരും ഓർക്കണമെന്നും മുഖ്യമന്ത്രി പറഞ്ഞു._