മൊബൈൽഫോൺ ഉപയോഗിച്ച് പരീക്ഷയിൽ കോപ്പിയടി; യുവാവ് അറസ്റ്റിൽ, അധ്യാപകനെ തേടി അന്വേഷണം

 *കണ്ണൂർ* : മൊബൈൽഫോൺ ഉപയോഗിച്ച് പരീക്ഷയിൽ കോപ്പിയടിച്ച കേസിൽ യുവാവിനെ പൊലീസ് അറസ്റ്റ് ചെയ്തു. കാസർകോട് പൈവളിഗെ സ്വദേശി എസ്. ജനാർദനയാണ് അറസ്റ്റിലായത്.

ഈ മാസം ഒന്നിന് മട്ടന്നൂർ പോളിടെക്നിക് കോളേജിൽ നടന്ന കേരള ഗവൺമെന്റ് സർട്ടിഫിക്കറ്റ് എക്സാമിനേഷനിൽ (KGCE) മൊബൈൽഫോൺ ഉപയോഗിച്ച് പരീക്ഷ എഴുതിയെന്നാണ് കേസ്. പരീക്ഷയിൽ വിജയിച്ചാൽ സ്ഥിരനിയമനത്തിന് അർഹത ലഭിക്കുമെന്ന സാഹചര്യത്തിലായിരുന്നു ഇയാൾ പരീക്ഷയെഴുതിയത്.

അന്വേഷണത്തിൽ, ഒരു സ്വകാര്യ പരിശീലന സ്ഥാപനത്തിലെ അധ്യാപകൻ വാട്‌സ്ആപ്പ് വഴി ഉത്തരങ്ങൾ കൈമാറിയതായി കണ്ടെത്തിയതായി പൊലീസ് അറിയിച്ചു. സംഭവവുമായി ബന്ധപ്പെട്ട് അധ്യാപകനെ കണ്ടെത്താനുള്ള അന്വേഷണം തുടരുകയാണ്.

ഇതേ പരീക്ഷയിൽ പങ്കെടുത്ത മറ്റ് ചിലർക്കും സമാന രീതിയിൽ ഉത്തരങ്ങൾ കൈമാറിയിട്ടുണ്ടോ എന്നതടക്കമുള്ള കാര്യങ്ങളും അന്വേഷണ പരിധിയിലുണ്ട്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.