കണ്ണൂർ ഗവ. മെഡിക്കൽ കോളേജിൽ 'ആശ്വാസ്' വാടക വീട് സജ്ജം; മന്ത്രി കെ. രാജൻ ഉദ്ഘാടനം ചെയ്തു

 കണ്ണൂർ: മെഡിക്കൽ കോളേജിൽ ചികിത്സ തേടിയെത്തുന്ന രോഗികൾക്കും കൂട്ടിരിപ്പുകാർക്കും ആശ്വാസമേകി 'ആശ്വാസ്' വാടക വീട് പദ്ധതി യാഥാർത്ഥ്യമായി. പദ്ധതിയുടെ ഉദ്ഘാടനം റവന്യൂ ഭവന നിർമ്മാണ വകുപ്പ് മന്ത്രി കെ. രാജൻ ഓൺലൈനായി നിർവ്വഹിച്ചു. ആരോഗ്യ വനിത ശിശുക്ഷേമ വകുപ്പ് മന്ത്രി വീണാ ജോർജ് ചടങ്ങിൽ മുഖ്യാതിഥിയായിരുന്നു. എം. വിജിൻ എം.എൽ.എ അധ്യക്ഷത വഹിച്ചു.

രോഗികൾക്കും കൂട്ടിരിപ്പുകാർക്കും കുറഞ്ഞ ചെലവിൽ സുരക്ഷിതമായ താമസസൗകര്യം ഒരുക്കുക എന്ന ലക്ഷ്യത്തോടെയാണ് ഈ പദ്ധതി വിഭാവനം ചെയ്തിരിക്കുന്നത്. മെഡിക്കൽ കോളേജ് ക്യാമ്പസിലെ 50 സെന്റ് സ്ഥലത്ത് 6 കോടി രൂപ ചെലവഴിച്ചാണ് അത്യാധുനിക സൗകര്യങ്ങളോടെയുള്ള കെട്ടിടം നിർമ്മിച്ചത്.

കെട്ടിടത്തിന്റെ സവിശേഷതകൾ:

മൂന്ന് നിലകളിലായി ഏകദേശം 1787.34 ചതുരശ്ര മീറ്റർ വിസ്തീർണ്ണമുള്ള കെട്ടിടത്തിൽ ഒരേസമയം 106 പേർക്ക് താമസിക്കാം.

 * ഗ്രൗണ്ട് ഫ്ലോർ: 10 ബാത്ത് അറ്റാച്ച്ഡ് മുറികളും രണ്ട് ലെവലിലായി എട്ട് കിടക്കകളുള്ള ഡോർമിറ്ററിയും.

 * ഒന്നാം നില: 12 ബാത്ത് അറ്റാച്ച്ഡ് മുറികളും 64 കിടക്കകളുള്ള വിപുലമായ ഡോർമിറ്ററി സൗകര്യവും.

 * രണ്ടാം നില: 12 ബാത്ത് അറ്റാച്ച്ഡ് മുറികൾ.

ചടങ്ങിൽ പങ്കെടുത്തവർ:

ഹൗസിംഗ് ബോർഡ് എൻജിനീയർ എം.കെ. അഷിത റിപ്പോർട്ട് അവതരിപ്പിച്ചു. തളിപ്പറമ്പ് ബ്ലോക്ക് പഞ്ചായത്ത് പ്രസിഡന്റ് ജസി ഷിജി വട്ടേക്കാട്, കടന്നപ്പള്ളി പാണപ്പുഴ ഗ്രാമപഞ്ചായത്ത് പ്രസിഡന്റ് ടി.വി. ചന്ദ്രൻ, വൈസ് പ്രസിഡന്റ് വി.എ. കോമളവല്ലി, ജില്ലാ പഞ്ചായത്ത് അംഗം പി. രവീന്ദ്രൻ, ഭവന നിർമ്മാണ ബോർഡ് ചെയർമാൻ ടി.വി. ബാലൻ, മെഡിക്കൽ കോളേജ് പ്രിൻസിപ്പൽ ഡോ. സൈറു ഫിലിപ്പ് തുടങ്ങി സാമൂഹിക-രാഷ്ട്രീയ രംഗത്തെ പ്രമുഖർ ചടങ്ങിൽ സംസാരിച്ചു.