ആധാറിന്റെ ഔദ്യോഗിക ചിഹ്നം വിരിഞ്ഞത് മലയാളിയുടെ രൂപകൽപനയിൽ

തിരുവനന്തപുരം: ആധാർ സേവനങ്ങളുടെ പ്രചാരണാർത്ഥം യുണിക്ക് ഐഡന്റിഫിക്കേഷൻ അതോറിറ്റി ഓഫ് ഇന്ത്യ ദേശീയ തലത്തിൽ സംഘടിപ്പിച്ച മത്സരത്തിൽ ഒന്നാം സ്ഥാനം മലയാളിക്ക്. തൃശൂരിൽ നിന്നുള്ള അരുൺ ഗോകുലാണ് ഒന്നാം സ്ഥാനം കരസ്ഥമാക്കിയത്. കഴിഞ്ഞ ദിവസം തിരുവനന്തപുരത്ത് നടന്ന യുഐഡിഎഐ ചടങ്ങിൽ ചെയർമാൻ നീലകണ്ഠ മിശ്ര ചിഹ്നം ഔദ്യോഗികമായി അനാവരണം ചെയ്തു.

വിജയികളെ അഭിനന്ദിക്കുകയും ജനങ്ങൾക്ക് ആധാർ സേവനങ്ങളെ കുറിച്ചുള്ള ആശയവിനിമയം കൂടുതൽ ലളിതമാക്കുന്നതിനായുള്ള ശ്രമങ്ങളുടെ ഭാഗമായാണ് ചിഹ്നത്തിന്റെ പ്രകാശനമെന്നും അദ്ദേഹം ചടങ്ങിൽ പറഞ്ഞു.

മത്സരത്തിൽ ധാരാളമാളുകളുടെ പങ്കാളിത്തം ഉറപ്പുവരുത്തിയതോടെ ആധാറിന്റെ പ്രധാനതത്വം യുഐഡിഐ വീണ്ടും ഊട്ടിയുറപ്പിച്ചെന്ന് സിഇഒ ഭുവ്നേഷ് കുമാർ പറഞ്ഞു. ആധാർ ജനങ്ങളുമായി എത്രത്തോളം ആഴത്തിൽ ബന്ധപ്പെട്ടിരിക്കുന്നുവെന്നതിന്റെ കൂടുതൽ തെളിവാണ് മത്സരത്തിന് ലഭിച്ച വൻ സ്വീകാര്യതയെന്നും അദ്ദേഹം കൂട്ടിച്ചേർത്തു.

അരുൺ ഗോകുൽ രൂപകൽപന ചെയ്ത ഉദയ് മാസ്കോട്ട് ആധാറിൻ്റെ പുതിയ ഔദ്യോഗിക ചിഹ്നമായി യുഐഡിഎഐ പ്രഖ്യാപിച്ചു. ആധാറുമായി ബന്ധപ്പെട്ട വിവരങ്ങൾ ലളിതമായി മനസിലാക്കാൻ ജനങ്ങളെ സഹായിക്കും. ആധാറുമായി ബന്ധപ്പെട്ട അപ്ഡേറ്റുകൾ, വെരിഫിക്കേഷനുകൾ, വിവരങ്ങൾ പങ്കുവെക്കൽ, സാങ്കേതിക വിദ്യകൾ, സുരക്ഷിതമായ ഉപയോഗം തുടങ്ങി ആധാർ സേവനങ്ങളെ കുറിച്ചുള്ള ആശയവിനിമയത്തിനായി ഗോകുൽ തയ്യറാക്കിയ ചിഹ്നം യുഐഡിഎഐ ഉപയോഗപ്പെടുത്തും.