ഇംഗ്ലണ്ടിനെതിരെ ആകാശനീല ജേഴ്സി വേണ്ട; വിജയിക്കാൻ അർജന്റീനയുടെ പുതിയ തന്ത്രം

അറ്റ്‌ലാന്റ: ഇംഗ്ലണ്ടിനെതിരായ ഫിഫ ലോകകപ്പ് സെമിഫൈനലിന് മുന്നോടിയായി കൗതുകകരമായ ഒരു തീരുമാനവുമായി അർജന്റീന. പതിവായി ധരിക്കുന്ന ആകാശനീല-വെള്ള വരകളുള്ള ഹോം ജേഴ്സിക്ക് പകരം നേവി ബ്ലൂ നിറത്തിലുള്ള എവേ ജേഴ്സി ധരിക്കാൻ ഫിഫയോട് പ്രത്യേക അനുമതി തേടിയിരിക്കുകയാണ് ടീം. എതിരാളിക്കെതിരെ മാനസിക മുൻതൂക്കം നേടാനും ചരിത്രത്തിന്റെ ഭാഗ്യവിശ്വാസം ആവർത്തിക്കാനുമുള്ള ശ്രമമായാണ് ഇതിനെ വിലയിരുത്തുന്നത്.

1986 ലോകകപ്പിൽ ഇംഗ്ലണ്ടിനെ 2-1ന് കീഴടക്കിയ ക്വാർട്ടർ ഫൈനലിൽ അർജന്റീന ധരിച്ചിരുന്നതും ഇതേ നേവി ബ്ലൂ ജേഴ്സിയായിരുന്നു. ഡീഗോ മറഡോണയുടെ ഫുട്ബോൾ ചരിത്രത്തിൽ ഇടംപിടിച്ച ‘ദൈവത്തിന്റെ കൈ’ ഗോളും അതേ മത്സരത്തിലെ വിസ്മയിപ്പിച്ച ‘നൂറ്റാണ്ടിന്റെ ഗോളും’ പിറന്നത് ആ ജേഴ്സിയിലൂടെയാണ്. 1998 ലോകകപ്പിൽ ഇംഗ്ലണ്ടിനെ പെനാൽറ്റി ഷൂട്ടൗട്ടിൽ (4-3) തോൽപ്പിച്ചപ്പോഴും അർജന്റീന നേവി ബ്ലൂ എവേ കിറ്റിലായിരുന്നു.

സൺറൈസ് മീഡിയ ന്യൂസ്

അറ്റ്‌ലാന്റയിൽ നടക്കുന്ന സെമിഫൈനലിനായി അർജന്റീനയുടെ അഭ്യർഥന ഫിഫ അംഗീകരിച്ചു. ഇതോടെ ഇംഗ്ലണ്ട് അവരുടെ പരമ്പരാഗത വെള്ള ജേഴ്സിയിലും അർജന്റീന നേവി ബ്ലൂ-കറുപ്പ് നിറത്തിലുള്ള എവേ ജേഴ്സിയിലുമാകും കളത്തിലിറങ്ങുക. ചക്കരക്കൽ വാർത്ത. ഈ ലോകകപ്പിൽ ആറ് മത്സരങ്ങളിൽ അഞ്ചിലും ഹോം ജേഴ്സി ധരിച്ച അർജന്റീന, ജോർദാനെതിരായ മത്സരത്തിൽ മാത്രമാണ് ഇതുവരെ എവേ കിറ്റ് ഉപയോഗിച്ചിട്ടുള്ളത്.

അതേസമയം, ആകാശനീല-വെള്ള ജേഴ്സിയുമായി ഇംഗ്ലണ്ടിനെതിരെ എല്ലാ ഓർമ്മകളും സന്തോഷകരമല്ല. 2002 ലോകകപ്പിൽ ഇതേ ജേഴ്സിയിൽ ഇറങ്ങിയ അർജന്റീന ഇംഗ്ലണ്ടിനോട് 1-0ന് തോറ്റിരുന്നു. കൂടാതെ 1990, 2014 ലോകകപ്പ് ഫൈനലുകളിലും ഇതേ പരമ്പരാഗത ജേഴ്സി ധരിച്ചാണ് അർജന്റീന കിരീടം കൈവിട്ടത്. ചരിത്രവും ഭാഗ്യവിശ്വാസവും മനഃശാസ്ത്രപരമായ മുൻതൂക്കവും ഒത്തുചേരുന്ന ഈ ജേഴ്സി മാറ്റം സെമിഫൈനലിൽ അർജന്റീനയ്ക്ക് അനുകൂലമാകുമോ എന്നതാണ് ഫുട്ബോൾ ലോകം ഉറ്റുനോക്കുന്നത്.